എച്ച്.ഐ.വി 

(HIV - Human Immunodeficiency Virus):

മനുഷ്യന്റെ പ്രതിരോധ സംവിധാനത്തെ ആക്രമിക്കുന്ന ഒരു വൈറസാണിത്. ശരീരത്തെ രോഗങ്ങളിൽ നിന്ന് സംരക്ഷിക്കുന്ന പ്രധാന കോശങ്ങളെയാണ് HIV നശിപ്പിക്കുന്നത്.

എയ്ഡ്സ് (AIDS - Acquired Immunodeficiency Syndrome) :

എച്ച്.ഐ.വി ബാധയുടെ അവസാന ഘട്ടമാണ് AIDS.ഈ ഘട്ടത്തിൽ ശരീരത്തിന്റെ പ്രതിരോധ ശേഷി വളരെ കുറയുന്നതിനാൽ ഗുരുതരമായ അണുബാധകളും രോഗങ്ങളും എളുപ്പത്തിൽ ഉണ്ടാകാം.

HIV ശരീരത്തിൽ എങ്ങനെ പ്രവർത്തിക്കുന്നു?

എച്ച്.ഐ.വി പ്രധാനമായും CD4+ കോശങ്ങളെ

(ടി-ഹെൽപ്പർ കോശങ്ങൾ) ലക്ഷ്യമാക്കുന്നു. ഇവയാണ് നമ്മുടെ പ്രതിരോധ സംവിധാനത്തിലെ പ്രധാന ഘടകം.

HIV ഒരു റെട്രോവൈറസ് ആണ്. അതായത്, ഇത് സ്വന്തം RNA-യെ DNA ആക്കി മാറ്റി മനുഷ്യന്റെ കോശങ്ങളിലെ DNA-യിലേക്ക് ചേർന്നു പ്രവർത്തിക്കുന്നു.

ഇതിലൂടെ വൈറസ് പതുക്കെ വ്യാപിക്കുകയും പ്രതിരോധ സംവിധാനത്തെ ദുർബലമാക്കുകയും ചെയ്യുന്നു.

രോഗത്തിന്റെ ഘട്ടങ്ങളും ലക്ഷണങ്ങളും:

അക്യൂട്ട് ഘട്ടം 

(Acute Infection):

വൈറസ് ശരീരത്തിൽ പ്രവേശിച്ചതിന് ശേഷം ആദ്യ ആഴ്ചകളിൽ പനി, തളർച്ച, കഴുത്തുവേദന തുടങ്ങിയ ഫ്ലൂ പോലുള്ള ലക്ഷണങ്ങൾ കാണാം.

ക്രോണിക് ഘട്ടം 

(Chronic Phase):

ഈ ഘട്ടത്തിൽ പുറത്തേക്ക് വ്യക്തമായ ലക്ഷണങ്ങൾ കാണിക്കണമെന്നില്ല. എന്നാൽ വൈറസ് ശരീരത്തിനുള്ളിൽ CD4 കോശങ്ങളെ നശിപ്പിച്ചുകൊണ്ടിരിക്കും. ഈ ഘട്ടം പല വർഷങ്ങൾ നീണ്ടുനിൽക്കാം.

എയ്ഡ്സ് ഘട്ടം (AIDS):

CD4 കോശങ്ങളുടെ എണ്ണം വളരെ കുറയുമ്പോൾ (സാധാരണയായി 200-ൽ താഴെ) രോഗം എയ്ഡ്സ് ഘട്ടത്തിലേക്ക് കടക്കുന്നു.

പ്രധാന ലക്ഷണങ്ങൾ:

ദീർഘകാല പനി,ഭാരം കുറയുക,വിട്ടുമാറാത്ത വയറിളക്കം,ഗുരുതര അണുബാധകൾ.

എച്ച്.ഐ.വി പകരുന്ന വഴികൾ:

സുരക്ഷിതമല്ലാത്ത ലൈംഗിക ബന്ധം,രോഗബാധിതരുടെ രക്തം ട്രാൻസ്ഫ്യൂസ് ചെയ്യുന്നത്,ലഹരി പദാർത്ഥങ്ങൾക്കായോ മറ്റോ ഒരേ സൂചി പലരും ഉപയോഗിക്കുന്നത്,രോഗബാധിതയായ അമ്മയിൽ നിന്ന് കുഞ്ഞിലേക്ക് (ഗർഭകാലത്ത്, പ്രസവ സമയത്ത്, അല്ലെങ്കിൽ മുലപ്പാലിലൂടെ).

രോഗനിർണ്ണയം (Diagnosis):

ആന്റിബോഡി ടെസ്റ്റ്, ആന്റിജൻ ടെസ്റ്റ്,

വൈറൽ RNA/DNA ടെസ്റ്റുകൾ.

ചികിത്സ (Treatment):

ആന്റി-റെട്രോവൈറൽ തെറാപ്പി (ART) ഉപയോഗിച്ച് വൈറസിന്റെ വളർച്ച നിയന്ത്രിക്കുന്നു,

രോഗത്തിന്റെ പുരോഗതി കുറയ്ക്കുന്നു,

പ്രതിരോധ ശേഷി സംരക്ഷിക്കുന്നു.